Sahir Hoshiyarpuri
duniya men har qadam pe hamen tirgi mili
dekha jo apne dil ki taraf raushni mili
ulfat mili ḳhulus mila dosti mili
har dil men ham ko apni hi tasvir si mili
nagah jaise bichhḌa hua ham-safar mile
gham mil gaya to dil ko baḌi tazgi mili
shayad miri talash ka maqsad hi tha ghalat
avaz di ḳhirad ko to divangi mili
hai apni zindagi ki ye tafsir-e-muḳhtasar
gham mustaqil mila to ḳhushi arizi mili
jo ho chala tha dil ko sukun un ke hijr men
vo mil ga.e to phir use varaftagi mili
ishrat-kada hai dahr magar shaiḳh ke liye
ham ko to ik ghaḌi bhi na aram ki mili
vo aur honge pi ke jo sarshar ho ga.e
har jaam se hamen to na.i tishnagi mili
jagir apni sha.eri pahle se thi magar
ik umr jab riyaz kiya sahiri mili
Leave a Reply