andhere se
kashid-e-subh ki
raushan gavahi mangne se
raat ke lamhe
na ghatte hain
na badhte hain
kabhi gahre bhanvar ke beach uthti
duriyon ki dhund men lipti
kisi ki sahili avaz
dariya ka kinara bhi nahin hoti
dukhon ki apni ik tafsir hoti hai
jo apne lafz khud ijad karti hai
jo khvabon se ulajhti hai
jo khvabon se ziyada
mo’atabar hoti hai
lekin kashf ka lamha
masafat ki hazaron manzilon ke baad aata hai
numud-e-gauhar-e-kamyab ki saaat men
khali sipiyon ka dher be-maani nahin hota
Leave a Reply