Poet
jab tire hijr ke asar nazar aate hain
mujh ko phulon men bhi phir ḳhaar nazar aate hain
muund liin is liye barbadi pe ankhen main ne
mere apne hi zimmedar nazar aate hain
ya vahi bughz vahi kiina vahi nafrat hai
ya mohabbat ke bhi asar nazar aate hain
main havaon ke ta.aqub men bhaTak jaati huun
phir ishare mujhe be-kar nazar aate hain
main bulandi se gira.i ga.i jis mehnat se
is men apnon ke bhi kirdar nazar aate hain
shash-jihat dukh ke hain ambar hi poshida yahan
jis qadar hain pas-e-divar nazar aate hain
aankh lagti hai to main ḳhauf se uTh jaati huun
ḳhvab men qafile ḳhun-ḳhar nazar aate hain
Leave a Reply