Lab-E-Shirin Hai Misri Yusuf-E-Sani Hai Ye Ladka

Poet

lab-e-shirin hai misri yusuf-e-sani hai ye ladka

na chhodega mera dil chah-e-kanani hai ye ladka

liya bosa kisi ne aur gareban-gir hai mera

dubaya chahta hai sab ko tufani hai ye ladka

sar uupar laal chira aur dahan juun ghuncha-e-rangin

bahar-e-muddaa lal-e-badkhshani hai ye ladka

qayamat hai jhamak baazu ke taviz-e-talai ki

hisar-e-husn kuun qaaim kiya baani hai ye ladka

hue ru-posh us ka husn dekh anjum ke juun khuban

chamakta hai ba-rang-mehr nurani hai ye ladka

qayamat qamat us ka jin ne dekha so hua bismil

magar sar ta qadam tegh-e-sulemani hai ye ladka

main apna jaan o dil qurban karun uus par seti ‘naji’

jise dekhen siin hue iid ramzani hai ye ladka