khule hain dasht men nafrat ke phuul ahista ahista
saron tak aati hai qadmon ki dhuul ahista ahista
abhi kuchh din lagenge mausamon ka bhed paane men
badal ja.enge yaron ke usuul ahista ahista
ziyan ka koi rishta umr-bhar qaa.em nahin rahta
so miT jaata hai har shauq-e-fuzul ahista ahista
mujhe jurm-e-hunar-mandi ka qaa.il hone do pahle
main har ilzam kar lunga qubul ahista ahista
ye dharti ek din banjar zamin ban ja.egi janan
gulabon ki jagah lenge babul ahista ahista
Leave a Reply