Dubta Saf Nazar Aaya Kinara Koi Dost

Dūbtā saaf nazar aayā kināra koī dost

phir bhī kashtī se nahīñ ham ne utārā koī dost

jab bhī nekī kā koī kaam kiyā hai ham ne

de diyā rab ne hameñ aap se pyārā koī dost

jiit par ḳhush ho tujhe is se ġharaz kyā mire yaar

terī ḳhushiyoñ ke liye jaan se haarā koī dost

kaise jī pā.eñge is shahr-e-pareshāñ meñ jahāñ

koī dushman hai hamārā na hamārā koī dost

kuchh to jiine ke liye ham ko bhī de rabb-e-karīm

sāġhar-o-mīnā kisī ġham kā sahārā koī dost

ruuTh jaa.e mirī āñkhoñ se bhale bīnā.ī

kaash rūThe na ‘vasī’ aañkh kā taarā koī dost

Leave a Comment