Qaisarul Jafri
Dubne vaalo havaon ka hunar kaisa laga
ye kinara ye samundar ye bhanvar kaisa laga
ponchhte ja.iye daman se lahu mathe ka
sochte ja.iye divar ko sar kaisa laga
haT ga.i chhanv magar log vahin baiThe hain
dasht ki dhuup men jaane vo shajar kaisa laga
dar-o-divar hain main huun miri tanha.i hai
chandni raat se puchho mira ghar kaisa laga
is se pahle kabhi ponchhe the kisi ne aansu
un ka daman tujhe ai dida-e-tar kaisa laga
sahl thiin marhala-e-tark-e-vafa tak rahen
is se aage koi puchhe ki safar kaisa laga
aankh se dekh liya tark-e-vatan ka manzar
ghar jahan chhoḌ ga.e the vo khanDar kaisa laga
vo mujhe sun ke baḌi der se chup hai ‘qaisar’
jaane us ko miri ghazlon ka hunar kaisa laga
Leave a Reply