Afzaal Firdaus
duub gaya hai ek sitara ankhon men
thahar gaya hai naqsh tumhara ankhon men
pathrai hain ankhen gham ki shiddat se
ruka hua hai mausam saara ankhon men
vo logon ke saath hansi men shamil thi
phail gaya lekin maskara ankhon men
main ne us ki ankhon men chehra dekha
us ne apna ruup sanvara ankhon men
bahut dinon se ham ko niind nahin aai
tum ne kaisa khvab utara ankhon men
charon janib paani ki pahnai hai
kahin nahin hai koi kinara ankhon men
liye hue phirta huun ek zamane se
tere chehre ka lashkara ankhon men
Leave a Reply