Dua

mujhe tu muzhda-e-kaifiyyat-e-davami de

mire khuda mujhe eazaz-e-na-tamami de

main tere chashma-e-rahmat se kaam kaam rahun

kabhi kabhi mujhe ehsas-e-tishna-kami de

mujhe kisi bhi muazzaz ka ham-rikab na kar

main khud kamaun jise bas vo nek-nami de

vo log jo kai sadiyon se hain nasheb-nashin

buland huun to mujhe bhi buland-bami de

tiri zamin ye tere chaman rahen abad

jo dasht-e-dil hai use bhi tu lala-fami de

bada surur sahi tujh se ham-kalami men

bas ek baar magar zauq-e-khud-kalami de

main doston ki tarah khaak uda nahin sakta

main gard-e-rah sahi mujh ko narm-gami de

agar girun to kuchh is tarah sar buland girun

ki maar kar mira dushman mujhe salami de

Leave a Comment