poet

Tumhein Han Kisi Se Mohabbat Kahan Hai

tumhen haan kisi se mohabbat kahan hai

zara dekhiye to vo surat kahan hai

bhala ab kisi se suno baat kya tum

tumhen apni baton se fursat kahan hai

har ik baat par roe se dete ho ab

vo shokhi kahan vo shararat kahan hai

pade rahte ho pahron hi munh lapete

vo jalsa kahan hai vo sohbat kahan hai

koi kuchh kahe ab tumhen kuchh na bolo

vo tezi kahan vo zarafat kahan hai

vo lag chalna har ik se aafat tumhara

vo tundi vo shokhi vo farhat kahan hai

koi janta bhi nahin ab to tum ko

vo pahli si khushbu men shohrat kahan hai

tumhin dekho aur ghair ki baten sunna

vo shaan ab kahan hai vo shaukat kahan hai

tumhen ho adu hi ka milna mubarak

adu ki si ham men liyaqat kahan hai

‘nizam’ aap hi aap aaega yaan par

yahan rashk sahne ki taqat kahan hai

More Poems

Leave a Comment