abhishek-shukla

Dar-e-Khayal Bhi Kholen Siyah Shab Bhi Karen

dar-e-khayal bhi kholen siyah shab bhi karen

phir us ke baad tujhe sochen ye ghazab bhi karen

vo jis ne shaam ke mathe pe haath phera hai

ham us charagh-e-hava-saz ka adab bhi karen

siyahiyan si bikharne lagi hain siine men

ab us sitara-e-shab-tab ki talab bhi karen

ye imtiyaz zaruri hai ab ibadat men

vahi dua jo nazar kar rahi hai lab bhi karen

ki jaise khvab dikhana tasalliyan dena

kuchh ek kaam mohabbat men be-sabab bhi karen

main janta huun ki tabir hi nahin mumkin

vo mere khvab ki tashrih chahe jab bhi karen

shikast-e-khvab ki manzil bhi kab nai hai hamen

vahi jo karte chale aaen hain so ab bhi karen

More Poems

Leave a Comment