Purnam Allahabadi
donon aalam se vo begana nazar aata hai
jo tire ishq men divana nazar aata hai
ishq-e-but ka.aba-e-dil men hai ḳhudaya jab se
tera ghar bhi mujhe but-ḳhana nazar aata hai
sho.ala-e-ishq men dekhe koi jalna dil ka
sham.a ke bhes men parvana nazar aata hai
misr ka chand bhi shaida hai azal se un ka
husn ka husn bhi divana nazar aata hai
baghban baagh men kis shoḳh ki tahrir hai ye
varaq-e-gul pe jo afsana nazar aata hai
hai ajab husn-e-tasavvur tire divane ka
tere jaisa tira divana nazar aata hai
un ki mast aankh mire dil men hai raqsan ‘purnam’
ḳhuub paimane men paimana nazar aata hai
Leave a Reply