Mela Ram Wafa
din juda.i ka diya vasl ki shab ke badle
lene the ai falak-e-pir ye kab ke badle
rahat-e-vasl kisi ko to kisi ko gham-e-hijr
sabr ḳhaliq ne diya hai mujhe sab ke badle
itni si baat pe bigḌe hi chale jaate ho
le lo tum bosa-e-lab bosa-e-lab ke badle
furqat-e-yar men jiine ke uTha.e ilzam
maut aa.i na mujhe hijr ki shab ke badle
aaj aghyar ‘vafa’ se na ulajh baiThe hon
taur aate hain nazar bazm-e-tarab ke badle
Leave a Reply