din guzarte rahe sanson men thakan aati rahi
dil men uḌ uḌ ke vahi gard-e-mehan aati rahi
thak ga.e arsa-e-ehsas men chalte chalte
raah men hasrat-e-kotahi-e-fan aati rahi
bas dariche se lage baiThe rahe ahl-e-safar
sabza jalta raha aur yad-e-vatan aati rahi
gulshan-e-dahr men kuchh bu-e-vafa baaqi hai
ki ḳhizan men bhi saba su-e-chaman aati rahi
phuul a.ankhon se guzar kar tah-e-dil men bhi khila
rut bhi badli to vahi bu-e-saman aati rahi
ahl-e-duniya zar-o-gauhar ki tamanna men rahe
os paḌti rahi suraj ki kiran aati rahi
ham kabhi chak-gareban the kabhi ḳhak-basar
kar guzarte rahe jo ishq men ban aati rahi
Leave a Reply