ahmad-rahi

Din Guzarta Hai Kahan Raat Kahan Hoti Hai

din guzarta hai kahan raat kahan hoti hai

dard ke maron se ab baat kahan hoti hai

ek se chehre to hote hain kai duniya men

ek si surat-e-halat kahan hoti hai

zindagi ke vo kisi mod pe gaahe gaahe

mil to jaate hain mulaqat kahan hoti hai

asmanon se koi buund nahin barsegi

jalte sahraon men barsat kahan hoti hai

yuun to auron ki bahut baten sunain un ko

apni jo baat hai vo baat kahan hoti hai

jaisi aghaz-e-mohabbat men hua karti hai

vaisi phir shiddat-e-jazbat kahan hoti hai

pyaar ki aag bana deti hai kundan jin ko

un ke zehnon men bhala zaat kahan hoti hai

More Poems

Leave a Comment