Dil Pukara Phans Ke Ku-E-Yar Mein

dil pukara phans ke ku-e-yar men

rok rakkha hai mujhe gulzar men

farq kya maqtal men aur gulzar men

Dhaal men hain phuul phal talvar men

lutf duniya men nahin takrar men

lekin un ke bosa-e-rukhsar men

tha jo shab ko saya-e-rukhsar men

tazgi kitni hai baasi haar men

fart-e-mayusi ne murda hasraten

dafn kar di hain dil-e-bimar men

shaad ho jaati hai duniya ai ruupe

kya karamat hai tiri jhankar men

atish-e-ulfat ki dhadkan badh gai

gir pada dil shola-e-rukhsar men

aah ke qabze men hai tasir ya

tegh hai dast-e-alam-bardar men

nashtar-e-mizhgan ki tezi ke sabab

ek kanta hai dil-e-pur-khar men

ab-e-paikan paas hai lekin nasib

phir bhi khushki hai lab-e-sofar men

khair ho ‘parvin’ dil-e-muztar mira

le chala phir kucha-e-dildar men

Leave a Comment