dil o nigah men ik raushni si lagti hai
tumhari yaad se vabastagi si lagti hai
ye kya sitam hai mahakti hui baharon men
har ek chehre pe pazhmurdagi si lagti hai
ye kis ke haath men aaya hai daur-e-paimana
labon pe apne badi tishnagi si lagti hai
ham apne ghar men bhi hain ab musafiron ki tarah
har ek chiiz yahan ajnabi si lagti hai
har ek saans pe pahra hai na-khudaon ka
ye zindagi bhi koi zindagi si lagti hai
hazar shauq numayan the jis nazar se kabhi
vahi nigah badi ajnabi si lagti hai
‘hayat’ kaun si ab raah ikhtiyar karen
har ek raah badi ajnabi si lagti hai