Javed Akhtar
dil men mahak rahe hain kisi aarzu ke phuul
palkon pe khilne vaale hain shayad lahu ke phuul
ab tak hai koi baat mujhe yaad harf harf
ab tak main chun raha huun kisi guftugu ke phuul
kaliyan chaTak rahi thiin ki avaz thi koi
ab tak sama.aton men hain ik ḳhush-gulu ke phuul
mere lahu ka rang hai har nok-e-ḳhar par
sahra men har taraf hain miri justuju ke phuul
divane kal jo log the phulon ke ishq men
ab un ke damanon men bhare hain rafu ke phuul
Leave a Reply