Jafar Sahni
dil men ḳhayal-e-ishq tha mehman ki tarah
arman saja tha ‘mir’ ke divan ki tarah
vus.at zamin ki kho ga.i basti ki bhiiḌ men
galiyon men shor bas gaya maidan ki tarah
sar par falak ko oḌhe bichha.e zamin vo
baiTha hai shaan se kisi sultan ki tarah
ghafil mire vajud se saaya mira raha
tha ham-safar vo shahr men anjan ki tarah
rakhta huun main aziiz rivayat ka silsila
girte mire makan ke dalan ki tarah
ye munfa.il si zindagi mujh ko nahin qubul
ahd-e-junun ke chak-e-gareban ki tarah
tevar se us ke aag tamanna men lag ga.i
jalne laga hai dil mira shamshan ki tarah
tere baghair ‘sahni’ taron ke darmiyan
mahfil udaas thi rah-e-viran ki tarah
Leave a Reply