laḌkhaḌate hue bhi aur sambhalte hue bhi
us ke dar par hi ga.e ḳhvab men chalte hue bhi
ishq asar thi har rahguzar us ki thi
ham bhaTak sakte na the raah badalte hue bhi
ishq hai ishq ba-har-hal numu pa.ega
ya.ani jalte hue bhi aur pighalte hue bhi
zindagi tere faqat ek tabassum ke liye
ham ki hanste hi rahe dard men Dhalte hue bhi
ek muddat se hain ham ishq men avara ba-kar
ya.ani ik umr hui phulte-phalte hue bhi
silsila tujh se hi tha tere talab-garon ka
barf hote hue bhi aag men jalte hue bhi
bin tire aisa andhera tha mire andar yaar
Dar laga ishq ke suraj ko nikalte hue bhi
Leave a Reply