dil meñ har-vaqt yaas rahtī hai
ab tabī.at udaas rahtī hai
un se milne kī go nahīñ sūrat
un se milne kī aas rahtī hai
maut se kuchh nahīñ ḳhatar mujh ko
vo to har-vaqt paas rahtī hai
āb-e-haivāñ jise bujhā na sake
zindagī ko vo pyaas rahtī hai
dil to jalvoñ se bad-havās hī thā
aañkh bhī bad-havās rahtī hai
un kī sūrat ajab hai sho.abada-bāz
duur rah kar bhī paas rahtī hai
dil kahāñ ‘arsh’ ab to pahlū meñ
ek tasvīr-e-yās rahtī hai