dil men hain vasl ke arman bahut
jam.a is ghar men hain mehman bahut
aa.e to dast-e-junun zoron par
chaak karne ko gareban bahut
meri janib se dil us ka na phira
dushmanon ne to bhare kaan bahut
le ke ik dil gham-e-kaunain diya
aap ke mujh pe hain ehsan bahut
tark-e-ulfat ka hamin ko hai gham
vo bhi hain dil men pasheman bahut
dil ke virane ka hai aalam kuchh aur
ham ne dekhe hain bayaban bahut
ḳhaak hone ko hazaron hasrat
ḳhuun hone ko hain arman bahut
sadma-e-hijr uThana mushkil
jaan dena to hai asan bahut
rashk jin par hai farishton ko ‘hafiz’
aise duniya men hain insan bahut
Leave a Reply