Hidayatullah Khan Shamsi
dil men ik shor uThate hain chale jaate hain
aap jazbat jagate hain chale jaate hain
roz jalta hai sar-e-sham umidon ka charagh
daman-e-lail bujhate hain chale jaate hain
vaqt-e-ruḳhsat to qayamat ka saman hota hai
gham ko siine se lagate hain chale jaate hain
ham to phirte hain mohabbat ka ḳhazana le kar
raah nafrat men luTate hain chale jaate hain
chand lamhon ki rifaqat men ka.i ḳhvab hasin
lala-o-gul ko dikhate hain chale jaate hain
ḳhushk honTon ko mire jhuTa tabassum de kar
phir se ankhon ko rulate hain chale jaate hain
kaun karta hai ada haqq-e-marasim ‘shamsi’
log bas rasm nibhate hain chale jaate hain
Leave a Reply