Dil Ki Ye Bekali Nahin Jati

dil kī ye bekalī nahīñ jaatī

aañkh se kyoñ namī nahīñ jaatī

ik na ik baat aisī hotī hai

jo kisī se kahī nahīñ jaatī

merī to jaan par banī hai ab

aur tirī dil-lagī nahīñ jaatī

tū mire rū-ba-rū na ho jab tak

dil kī hālat kahī nahīñ jaatī

vaqt garche guzartā jaatā hai

hijr kī par ghaḌī nahīñ jaatī

rah ke pardes meñ na jaane kyoñ

dil kī ye tishnagī nahīñ jaatī

jhuuT chehre pe darj hai tere

dāstāñ tak ghaḌī nahīñ jaatī

kar chukā paash paash vo dil ko

ġham kī shiddat sahī nahīñ jaatī

yuuñ mayassar mujhe sabhī kuchh hai

ek terī kamī nahīñ jaatī

garche tere hai chaar sū raunaq

dil kī be-raunaqī nahīñ jaatī

ye jo talḳhī hai us ke lahje meñ

‘shamsa’ mujh se sahī nahīñ jaatī

Leave a Comment