Ek Hi Bar Nahin Hai Wo Dobara Kam Hai

ek hi baar nahin hai vo dobara kam hai

main vo dariya huun jise apna kinara kam hai

vahi takrar hai aur ek vahi yaksani

is shab-o-roz men ab apna guzara kam hai

mere din raat men karna nahin ab is ko shumar

hissa-e-umr koi main ne guzara kam hai

main ziyada huun bahut us ke liye ab tak bhi

aur mere liye vo saare ka saara kam hai

us ki apni bhi tavajjoh nahin mujh par koi khaas

aur main ne bhi abhi us ko pukara kam hai

aaj paani jo uchhalta nahin pahle ki tarah

aisa lagta hai ki is men koi dhara kam hai

haath pair aap hi main maar raha huun filhal

Dubte ko abhi tinke ka sahara kam hai

main to rakhta huun bahut rose ke rose in ka hisab

asman par koi aaj ek sitara kam hai

pesh-raft aur abhi mumkin bhi nahin hai ki ‘zafar’

abhi us shokh pe kuchh zor hamara kam hai

Leave a Comment