dil ke daghon men sitaron ki chamak baaqi hai
shab-e-furqat abhi do-char palak baaqi hai
surḳh honTon ke diye zehan men raushan hain abhi
abhi afkar men zulfon ki mahak baaqi hai
bazuon men tire paikar ki latafat raqsan
ungliyon men tiri bahon ki lachak baaqi hai
qasr-e-parvez men gum ho ga.i shirin ki sada
daman-e-koh men teshe ki dhamak baaqi hai
sarsar-e-jaur ne har-chand ḳhizan bikhra.i
phuul men aag shagufon men lahak baaqi hai
gul khila.egi abhi aur na jaane kya kya
ye jo pahlu men mahakti si kasak baaqi hai
Leave a Reply