bichhaD Kar Un Se Yun Gham Mein Guzari Zindagi Humne

Ehsan Danish

bichhaḌ kar un se yuun gham men guzari zindagi ham ne

sahar tarik dekhi surḳh paa.i chandni ham ne

hamen da.ava nahin tanha nibahi dosti ham ne

mohabbat ko sambhala hai kabhi tum ne kabhi ham ne

ḳhushi gham men nazar aa.i ḳhushi men gham nazar aaya

abhi duniya pe Daali thi nigah-e-sarsari ham ne

baḌi bechargi nikli bahut hi narasi paa.i

azal ke roz baḌh kar le to li thi bandagi ham ne

jahan saz-e-mohabbat par mughanni ga nahin sakta

vahan naghma alapa hai kabhi tum ne kabhi ham ne

tumhen hoge nigah-e-shauq ka markaz tumhin hoge

agar is zindagi ke ba.ad paa.i zindagi ham ne

hamare samne har-vaqt anjam-e-shikayat thi

kahi ko an-kahi kar di suni ko an-suni ham ne

bharegi is men rang ‘ehsan’ duniya inqilabon se

lahu se apne ik tasvir aisi khinch diin ham ne