poet

Dil Ke Aate Hi Ye Naqsha Ho Gaya

dil ke aate hi ye naqsha ho gaya

kya bataun dosto kya ho gaya

tum ne fursat paai ghar baithe tabib

mar gaya bimar achchha ho gaya

kar chuka tha kaam afsun-e-raqib

aaj ham se un se parchha ho gaya

un pe dil aaya badi mushkil padi

muddai pahlu men paida ho gaya

haae betabi ne meri kya kiya

haal sab un par huvaida ho gaya

ek zalim par tabiat aa gai

phir vahi ab haal mera ho gaya

shukr hai paida kiya khaliq ne jism

ruuh ka kuchh din ko parda ho gaya

khul gae zakhmon ke munh achchha hua

dard ke badhne ko rasta ho gaya

tu hi chal ai ruuh josh-e-shauq hai

khat ke aane men to arsa ho gaya

vaqt-e-bad kuchh puchh kar aata nahin

hanste hanste un se jhagda ho gaya

haal kyuun abtar hai is darja ‘nasim’

sach kaho dil kis pe shaida ho gaya

More Poems

Leave a Comment