bachcha bana hua hai baghavat ke ba.ad bhi
nadim nahin hai koi shararat ke ba.ad bhi
taana barasti aag men kaghaz ka sa.eban
jal bujh ga.e hain log hifazat ke ba.ad bhi
manzil pe ja ke paanv ke chhale ubal paḌe
ham ko sukun mila na masafat ke ba.ad bhi
suraj ki raushni bhi na dil men utar saki
ThanDak rahi badan men tamazat ke ba.ad bhi
hote hi shaam yurish-e-ḳhalvat ne aa liya
masruf ho gaya main faraghat ke ba.ad bhi
jo kuchh kaha gaya use maane nahin hain ham
baghi raha hai zehn hirasat ke ba.ad bhi
ab phir usi ke naam pe bekal hua hai ‘jan’
dil men vahi taḌap hai adavat ke ba.ad bhi
Leave a Reply