siskiyan leti hui ghamgin havao chup raho
so rahe hain dard un ko mat jagao chup raho
raat ka patthar na pighlega shuaon ke baghair
sub.h hone tak na bolo ham-navao chup raho
band hain sab mai-kade saaqi bane hain mohtasib
ai garajti gunjti kaali ghatao chup raho
tum ko hai malum aḳhir kaun sa mausam hai ye
fasl-e-gul aane talak ai ḳhush-navao chup raho
soch ki divar se lag kar hain gham baiThe hue
dil men bhi naghma na koi gungunao chup raho
chhaT ga.e halat ke badal to dekha ja.ega
vaqt se pahle andhere men na jaao chup raho
dekh lena ghar se niklega na ham-saya koi
ai mire yaaro mire dard-ashnao chup raho
kyuun sharik-e-gham banate ho kisi ko ai ‘qatil’
apni suuli apne kandhe par uThao chup raho
Leave a Reply