dil ka darvaza khula ho jaise
aur koi jhank raha ho jaise
dhyan tera sahar-o-sham nahin
tu mujhe bhuul gaya ho jaise
dil men kuchh aur labon par kuchh aur
tark-e-ulfat ki dua ho jaise
phir vahi zulm vahi ḳhalq-e-ḳhuda
ḳhushk patton men hava ho jaise
shahr-e-bedad men hubb-ul-vatani
ik munafiq ki vafa ho jaise
dard be-nur hua jaata hai
kam-nigahi ki saza ho jaise
daf.atan zehn men vo gardish-e-mai
ik bagula sa uTha ho jaise
muddaton ba.ad sar-e-rahguzar
ajnabi koi mila ho jaise
jur.a-o-lams ki daryuza-gari
ruuh men qaht paḌa ho jaise
yaad yuun dil se guzarti hai ‘munir’
dasht men abla-pa ho jaise
Leave a Reply