ameer-minai

Dil Juda Mal Juda Jaan Juda Lete Hain

dil juda maal juda jaan juda lete hain

apne sab kaam bigad kar vo bana lete hain

ho hi rahta hai kisi but ka nazara ta-sham

subh ko uth ke jo ham nam-e-khuda lete hain

majlis-e-vaz men jab baithte hain ham mai-kash

dukhtar-e-raz ko bhi pahlu men bitha lete hain

aise bose ke evaz mangte hain dil kya khuub

ji men sochen to vo kya dete hain kya lete hain

apni mahfil se uthae hain abas ham ko huzur

chupke baithe hain alag aap ka kya lete hain

but bhi kya chiiz hain allah salamat rakkhe

galiyan de ke gharibon ki dua lete hain

shakh-e-marjan men javahar nazar aate hain ‘amir’

kabhi ungli jo vo danton men daba lete hain

More Poems

Leave a Comment