Dil Jab Se Dard-E-Ishq Ke Qabil Nahin Raha

Safi Aurangabadi

dil jab se dard-e-ishq ke qabil nahin raha

ik nagavar chiiz hai ab dil nahin raha

vo main nahin raha vo mira dil nahin raha

ab un ko munh dikhane ke qabil nahin raha

kya iltija-e-did karun dekhta huun main

a.ina bhi hamesha muqabil nahin raha

ab vo ḳhafa hue hain to yuun bhi hai ik ḳhushi

marna hamare vaste mushkil nahin raha

duniya gharaz ki rah ga.i ab is se kiya gharaz

chaliye ki lutf-e-shirkat-e-mahfil nahin raha

sun sun ke ahl-e-ishq-o-mohabbat ke vaqi.at

duniya ka koi kaam bhi mushkil nahin raha

duniya ke nek-o-bad pe miri raa.e kuchh nahin

ab tak idhar ḳhayal hi maa.il nahin raha

mujh se na puchho hasrat-e-ara.ish-e-jamal

a.ina ban ke un ke muqabil nahin raha

ik na-umid ke liye itna na sochiye

azurda dil raha bhi to be-dil nahin raha

vo jaan le chuken to koi un se puchh le

ab to kuchh us gharib pe fazil nahin raha

aaya na ḳhvab men bhi kabhi ghair ka ḳhayal

ghaflat men bhi main aap se ghafil nahin raha

be-bandagi bhi us ki rahi banda-parvari

milta raha agarche main saa.il nahin raha

vo haath hain safi’ mujhe ik astin ka saanp

gardan men dost ke jo hama.il nahin raha