nazm ḳhabron ko kiya aur na latife likkhe
main ne ash.ar men jiine ke saliqe likkhe
martabe ahl-e-suḳhan ke tumhen tai karne hain
kis ne haq baat kahi kis ne qaside likkhe
sab ko tadbir bhi karne ko vahi kahta hai
aur hain sab ke muqaddar bhi usi ke likkhe
shiddat-e-mehr se di us ke ghazab ko tashbih
us ki rahmat ko agar fazl ke saae likkhe
kuchh zarur un men nasihat thi magar yaad nahin
jo paḌhe the vo buzurgon ke maqule likkhe
zindagi tujh pe likhunga na ziyada ab kuchh
jo bhi mazmun tiri mad.h men likkhe likkhe
likhta rahta hai vahi harf-e-ta.alluq ‘aḳhtar’
us se kah do ki ab is baat se aage likkhe
Leave a Reply