Imtiyaz Khan
dil-e-shikasta ki nim-jan ḳhvahishon ko jiina sikha rahi hai
nigah-e-afsun-bayan us ki buton se sajda kara rahi hai
ye phuul ḳhushbu ye chand-tare ye girti bunden ye abr-pare
sab us ki aamad ke muntazir hain vo ḳhud ko sabse chhupa rahi hai
ye chandni men nahaya dariya ye mahfil-e-shab bhi ḳhuub lekin
main chand par ja raha huun mujh ko vo ik za.ifa bula rahi hai
jo reg-e-dil pe likha hai us ko dukhon ka paani miTa na Daale
main ḳhvab dekhe hi ja raha huun ye aankh barse hi ja rahi hai
kabhi ḳhamoshi kabhi tabassum kabhi ḳhayalon ki dhund men gum
miri udasi to har qadam par qaba badalti hi ja rahi hai
vo ḳhush-bayan ‘imtiyaz’ vo lafz lafz jaadu chalane vaala
vo kal mila tha to kah raha tha ḳhamoshi andar se kha rahi hai
Leave a Reply