Aslam Kolsarii
dil-e-pur-ḳhun ko yadon se ulajhta chhoḌ dete hain
ham is vahshi ko jangal men akela chhoḌ dete hain
na jaane kab koi bhige hue manzar men aa nikle
dayar-e-ashk men palken jhapakna chhoḌ dete hain
use bhi dekhna hai apna me.ar-e-pazira.i
chala aa.e to kya kahna taqaza chhoḌ dete hain
ghamon ki bhiiḌ jab bhi qarya-e-jan ki taraf aa.e
bilakte ḳhvab ḳhamoshi se rasta chhoḌ dete hain
kisi ki yaad se dil ko munavvar tak nahin karna
isi ka naam duniya hai to duniya chhoḌ dete hain
hamen ḳhushbu ki surat dasht-e-hasti se guzarna tha
achanak yuun hua lekin ye qissa chhoḌ dete hain
zara se ashk men chhup kar un ankhon men nahin rahna
chalo ‘aslam’ hami ku-e-tamanna chhoḌ dete hain
Leave a Reply