dil-e-nadan koi mahshar na uThana is vaqt
aa raha hai miri baton men zamana is vaqt
karb-e-tanha.i ki tavil to mushkil hai bahut
kaise chup-chap hua aap ka aana is vaqt
rasm-e-tajdid-e-marasim bhi zaruri hai magar
yaad aaya hai mujhe vaqt purana is vaqt
ye ghaḌi koi faramosh nahin kar sakta
meri ankhon men hai ik ḳhvab suhana is vaqt
aa raha hai koi phir dam-e-nazar men ‘ja.afar’
aise manzar se nigahen na haTana is vaqt
Leave a Reply