Dil Badalne Se Na Aflak Badal Jaane Se

Alam Khursheed

dil badalne se na aflak badal jaane se

shahr badla miri poshak badal jaane se

kis qadar ho ga.i asan hamari mushkil

ek paimana-e-idrak badal jaane se

aaj bhi raqs hi karna hai isharon pe hamen

fa.eda kuchh na hua chaak badal jaane se

rasta ab bhi vahi hai miri manzil bhi vahi

tez-rau main hua pechak badal jaane se

bhiiḌ baḌhne lagi hai mere bahi-ḳhvahon ki

ik zara surat-e-namnak badal jaane se

niind aati thi bahut farsh-e-zamin par mujh ko

ḳhvab ruThe miri imlak badal jaane se

be-vatan main huun magar ḳhush hain mire ghar vaale

itna hasil to hua ḳhaak badal jaane se

badli badli si nazar aati hai duniya ‘alam’

bas mizaj-e-ḳhas-o-ḳhashak badal jaane se