Kahan haTta Hai Nigahon Se haTae Hae

Jawad Sheikh

kahan haTta hai nigahon se haTa.e haa.e

vahi manzar ki jise dekh na paa.e haa.e

kya pata saari tamanna.en dhuan ho ga.i hon

kuchh nikalta hi nahin dil se siva.e haa.e

yaad aati hui ik shakl pe allah allah

dil men uThti hui har Tiis pe haa.e haa.e

us gali ja ke bhi sajda na tumhen yaad raha

sirf nazren hi jhuka.e chale aa.e haa.e

saari mushkil hi nihan hai miri asani men

kaun ye ḳhasta si divar gira.e haa.e

roz ik taaza chilam bhar ke mujhe de farhad

aur phir qais mire paanv daba.e haa.e

dil ke bekar dhaḌakne pe kahan ḳhush the miyan

ham to phule na sama.e ba-sada-e-ha.e

jab vo jaa.e to mujhe kuchh bhi na bhaa.e ‘javvad’

aur jab aa.e to kuchh aa.e na jaa.e haa.e