Qayyum Tahir
dikha.e gard ke ḳheme pa ghar nahin likkha
safar to saunp gaya vo shajar nahin likkha
vo ashna mujhe paani se kar ke lauT gaya
kisi bhi lahr men jis ne guhar nahin likkha
basharaten thiin ki poron ki samt aati thiin
magar ye haath ki jin men hunar nahin likkha
ajab guman the qaus-e-nigah men us ki
khanDar se shahr ko is ne khanDar nahin likkha
har ek rut ki dua bhi hava bhi aa.i thi
ye banjh peḌ ki in par samar nahin likkha
us ek lafz ki siski mujhe rulati hai
vo ek lafz jise jaan kar nahin likkha
Leave a Reply