didani ab safar-e-zist ka manzar hoga
jis ne luuTa sar-e-bazar vo rahbar hoga
hal-e-dil kah ke hue aur giraftar-e-alam
ham na kahte the ki yuun dard fuzun-tar hoga
jite-ji ham se kabhi harf-e-vafa kah Daalo
phir ye hoga bhi jo ehsan to kis par hoga
tu miri jur.at-e-guftar par hairan kyuun hai
ye tamasha tiri sarkar men aksar hoga
un ki ankhon men chamakte hue taare dekhe
ab to naseh bhi pasheman barabar hoga
ham bhi ab ‘arsh’ naya bab-e-vafa kholenge
shahpar-e-shauq mah-o-mehr ka ham-sar hoga
Leave a Reply