dida-o-dil ki faza par gham ke badal chha ga.e
us ke jaate hi nigahon ke ufuq sanvla ga.e
dil to patthar ban gaya tha mom kis ne kar diya
muddaton ba.ad aaj kyuun ankhon men aansu aa ga.e
thi sukut-e-dil se pahle bazm-e-hasti par ḳharosh
phir vo sannaTa hua taari ki ham ghabra ga.e
be-hisi ka sard mausam zindagi par chha gaya
dil men raushan the jo angare vo sab kajla ga.e
ru-ba-ru ik ajnabi chehra savali ki tarah
aa.ina dekha to ai ‘maḳhmur’ ham ghabra ga.e
Leave a Reply