Bakhsh Layalpuri
dida-e-be-rang men ḳhun-rang manzar rakh diye
ham ne is dasht-e-tapan men bhi samundar rakh diye
vo jagah jo la.al-o-gauhar ke liye maqsud thi
kis ne ye sang-e-malamat us jagah par rakh diye
ab kisi ki chiḳh kya ubhre ki mir-e-shahr ne
sakinan-e-shahr ke sinon pe patthar rakh diye
shaḳh-saron par na jab izn-e-nasheman mil saka
ham ne apne ashiyan dosh-e-hava par rakh diye
ahl-e-zar ne dekh kar kam-zarfi-e-ahl-e-qalam
hirs-e-zar ke har tarazu men suḳhan-var rakh diye
ham to abresham ki surat narm-o-nazuk the magar
talḳhi-e-halat ne lahje men ḳhanjar rakh diye
jis hava ko vo samajhte the ki chal sakti nahin
us hava ne kaaT kar lashkar ke lashkar rakh diye
‘baḳhsh’ sayyad-e-azal ne hukm-e-azadi ke saath
aur asiri ke bhi ḳhadshe dal ke andar rakh diye
Leave a Reply