dhuup pichha nahin chhodegi ye socha bhi nahin
ham vahan hain jahan divar ka saaya bhi nahin
jaane kyuun dil mira bechain raha karta hai
milna to duur raha us ko to dekha bhi nahin
aap ne jab se badal daala hai jiine ka chalan
ab mujhe talkhi-e-ahbab ka shikva bhi nahin
mai-kada chhode hue mujh ko zamana guzra
aur saaqi se mujhe duur ka rishta bhi nahin
daam men rakhta parindon ki udanen lekin
par katarne ka magar us ko saliqa bhi nahin
muskurahat men koi tanz bhi ho sakta hai
ye masarrat ki alam-dar ho aisa bhi nahin
laakh yadon ki taraf laut ke jaun ‘shahin’
parda-e-dil par ab us shakhs ka chehra bhi nahin
Leave a Reply