Anjum Irfani
dhuup aati nahin ruḳh apna badal kar dekhen
chaḌhte suraj ki taraf ham bhi to chal kar dekhen
baat kuchh hogi yaqinan jo ye hote hain nisar
ham bhi ik roz kisi sham.a pe jal kar dekhen
sahib-e-jubba-o-dastar se kah de koi
is bulandi pe vo dekhen to sambhal kar dekhen
kya ajab hai ki ye muTThi men hamari aa jaa.e
asman ki taraf ik baar uchhal kar dekhen
daagh daman pe kisi ke na koi haath hi tar
kyuun na chehre pe lahu apna hi mal kar dekhen
kis tarah samt-e-muḳhalif men safar karte hain ham
bahte dhare se kabhi aap nikal kar dekhen
ḳhaak men mil ke fana honge jo moti hain yahan
jab bhi ji chahe ye ankhon se ubal kar dekhen
yak-ba-yak jaan se guzarna to hai asan ‘anjum’
qatra qatra ka.i qiston men pighal kar dekhen
Leave a Reply