shad-azimabadi

Dhundoge Agar Mulkon Mulkon Milne Ke Nahin Nayab Hain Hum

DhunDoge agar mulkon mulkon milne ke nahin nayab hain ham

jo yaad na aae bhuul ke phir ai ham-nafaso vo khvab hain ham

main hairat o hasrat ka maara khamosh khada huun sahil par

dariya-e-mohabbat kahta hai aa kuchh bhi nahin payab hain ham

ho jaae bakheda paak kahin paas apne bula len behtar hai

ab dard-e-judai se un ki ai aah bahut betab hain ham

ai shauq bura is vahm ka ho maktub tamam apna na hua

vaan chehre pe un ke khat nikla yaan bhule hue alqab hain ham

kis tarah tadapte ji bhar kar yaan zoaf ne mushkin kas diin hain

ho band aur atish par ho chadha simab bhi vo simab hain ham

ai shauq pata kuchh tu hi bata ab tak ye karishma kuchh na khula

ham men hai dil-e-betab nihan ya aap dil-e-betab hain ham

lakhon hi musafir chalte hain manzil pe pahunchte hain do ek

ai ahl-e-zamana qadr karo nayab na hon kam-yab hain ham

murghan-e-qafas ko phulon ne ai ‘shad’ ye kahla bheja hai

aa jaao jo tum ko aana ho aise men abhi shadab hain ham

More Poems

Leave a Comment