Nasir Shahzad
dhun nahin koi mudda.a kaisa
dil hua dekh be-sada kaisa
meri tausif saal sadiyan sana
men nahin jab to phir ḳhuda kaisa
lift khambe tu aur main peḌ pahaḌ
vaqt vaadi men jam gaya kaisa
dusron ki kahi-suni pe na ja
tu bata tujh se main raha kaisa
shab ki shab saath phir na bol na baat
kya kahun hai vo sanvra kaisa
main tujhi men nihan tujhi pe ayaan
main huun maujud mavara kaisa
rang men baas ang umang men pyaas
phuul hi hai vo phuul sa kaisa
samne sach ke karbala-o-damishq
kalima-e-haq pe aur sila kaisa
do alag bans purkh-pat birha
ab tire sang silsila kaisa
kohar kohsar raat tera saath
chand nikla naya naya kaisa
aarzu ik janam maran yakja
mujh men tujh men tha rabta kaisa
zulm mansab sabhi ka tu ho ki main
luun yahan haqq-e-ḳhun-baha kaisa
dhaḌke pal chhan sajan salone bin
dil hai be-dard banvara kaisa
Leave a Reply