insha-allah-khan-insha

Dhum Itni Tere Diwane Macha Sakte Hain

dhuum itni tire divane macha sakte hain

ki abhi arsh ko chahen to hila sakte hain

mujh se aghyar koi aankh mila sakte hain

munh to dekho vo mire samne aa sakte hain

yaan vo atish-e-nafasan hain ki bharen aah to jhat

aag daman-e-shafaq ko bhi laga sakte hain

sochiye to sahi hat-dharmi na kiije sahab

chutkiyon men mujhe kab aap uda sakte hain

hazrat-e-dil to bigad aae hain is se lekin

ab bhi ham chahen to phir baat bana sakte hain

shaikhi itni na kar ai shaikh ki rindan-e-jahan

ungliyon par tujhe chahen to nacha sakte hain

tu giroh-e-fuqara ko na samajh be-jabrut

zat-e-maula men yahi log sama sakte hain

dam zara saadh ke lete hain phareri to abhi

suun khinchi hui lahut ko ja sakte hain

garche hain munis-o-gham-khvar tag-o-dau men sahi

par tiri taba ko kab raah pe la sakte hain

charasaz apne to masruf-e-badal hain lekin

koi taqdir ke likkhe ko mita sakte hain

hai mohabbat jo tire dil men vo ik taur pe hai

ham ghata sakte hain is ko na badha sakte hain

kar ke jhuta na diya jaam agar tu ne to chal

maare ghairat ke ham afyun to kha sakte hain

ham-nashin tu jo ye kahta hai ki qadghan hai bahut

ab vo avaz bhi kab tujh ko suna sakte hain

ai na avaz sunaven mujhe dar tak aa kar

apne paanv ke kadon ko to baja sakte hain

ham to hanste nahin par aap ke hansne ke liye

aur agar saang nahin koi bana sakte hain

kaali kaghaz ki abhi ek katar kar becha

zahid-e-bazm ke munh par to laga sakte hain

ghar se bahar tumhen aana hai agar mana to aap

apne kothe pe kabutar to uda sakte hain

jhulte hain ye jo jholi men so kahte hain mujhe

ek vaade pe tujhe barson jhula sakte hain

ek Dhab ke jo qavafi hain ham un men ‘insha’

ik ghazal aur bhi chahen to suna sakte hain

More Poems

Leave a Comment