hama-vaqt jo mire saath hain ye ubharte Dubte saa.e se
kisi raushni ke sarab hain ki mile har apne para.e se
ḳham-e-jada se main piyada-pa kabhi dekh leta huun ḳhvab-sa
kahin duur jaise dhuan uTha kisi bhuli-bisri sara.e se
uThi mauj-e-dard to yak-ba-yak mire as-pas bikhar ga.e
mah-e-nim-shab ke idhar udhar jo laraz rahe the kina.e se
mila mujh ko raah men ik nagar jahan koi shaḳhs na tha magar
vo zamin shagufta shagufta si vo makan naha.e naha.e se
mire kar-zar-e-hayat men rahe umr-bhar ye muqable
kabhi saaya dab gaya dhuup se kabhi dhuup dab ga.i saa.e se
Leave a Reply