Sufi

dhuan Sifat Hun Khalaon Ka Hai Safar Mujhko

dhuan sifat huun ḳhalaon ka hai safar mujh ko

uḌa rahi hain havaen idhar udhar mujh ko

main us ki aankh se gir kar vajud kho baiTha

vo dhundhta hai bhala kyuun dagar dagar mujh ko

javan hon hausle jis ke vo mere saath chale

kaḌakti dhuup men sahra ka hai safar mujh ko

badan ko chhoḌ ke teri talash men nikla

na rok paenge raste men bahr-o-bar mujh ko

abhi kuchh aur tiri justuju rulaegi

abhi kuchh aur bhaTakna hai dar-ba-dar mujh ko

vo shoḳh shoḳh si panhariyan kidhar ko gaiin

udaas kar gai panghaT ki rahguzar mujh ko

junun ke adna ishare pe chaunk jaata huun

ḳhirad ki baat ka hota nahin asar mujh ko

main asman ki bulandi ko raund aaya huun

zamin valon ne samjha shikasta-par mujh ko

usi ne yaad dilai hai aaj gautam ki

rishi laga hai ye sukha hua shajar mujh ko

miTa rahe hain mujhe mere qari-o-naqid

kisi ne samjha kahan harf-e-mo’tabar mujh ko

main apne vaqt ka mansur bhi nahin ‘hasrat’

ye log kis liye laae hain daar par mujh ko

More Poems

Leave a Comment